摘要：[f. 1r°] Todas las cosas que an entendimiento e rrazón de conosçer a Dios deue[n] 1 querer saber que Dios es vno, sin par, criador e fazedor de todas las cosas 2 . En el comienço es Dios palabra, ssegúnt da testimonio sant Juan en el su santo euangelio en que diz “in prinçipio era uerbun”, que quiere dezir que Dios en el comienço e que Dios es palabra. E por çierto dixo verdat, que la palabra es rrazonada ; dizen los grandes filósofos 3 : rretórica, que es vno de los argumentos de las siete artes de la alta sapiençia, por el mundo ha rregimiento. E los omes son mantenidos e gouernados bien e sabiamente. E de la fermosa rretórica se fazen muy fe[r]mosas estorias en tienpo antiguo que quedan por en exenplo de los nobles que los fechos buenos fazen, e toman de los castiguos los que los oye[n] e loan los fechos grandes, e rrecuentan las vidas e los nonbres de los rreyes e de los altos señores que los fazen. E porque dezían “noble arte”, le fazen e conponen los fechos pasados que quedan por enxenplo a los que son por venir. E por ende en aviendo comienço el rreyno del rrey Pelayo fijo del duc don Fáuila de 4 Cantabria 5 en la era de sieteçientos e quarenta e vn años. E rreynó doze años. En el año dozeno, veno a él don Alfonso fijo del duc don Pedro de Cantabria e casóle con su fija. E començó su rreynado çinco a[ñ]os 6 después de la muerte del rrey Rrodrigo.
